Mat 3 | KPG | STEP | Di madagoaa deelaa, John Babdais gu hanimoi gi lodo di anggowaa i Judea, ga daamada ga agoago,

a 3.2:Mt 4.17; Mk 1.15

b 3.3:Is 40.3

c 3.4:2 Kgs 1.8

d 3.7:Mt 12.34, 23.33

e 3.9:Jn 8.33

f 3.10:Mt 7.19

g 3.17:Gen 22.2; Ps 2.7; Is 42.1; Mt 12.18, 17.5; Mk 1.11; Lk 9.35

Matthew 3

Nia agoago John Babdais

(Mark 1.1-8; Luke 3.1-18; John 1.19-28)

1 Di madagoaa deelaa, John Babdais gu hanimoi gi lodo di anggowaa i Judea, ga daamada ga agoago, 2 “Goodou gi huli gi daha mo godou huaidu, idimaa, Tenua o God di Langi la gu hoohoo mai!” ^a 3 John la go taane dela nogo helekai ai soukohp Isaiah boloo:

“Tangada e wolowolo i lodo di anggowaa boloo, Haga aadee ina di ala o Dimaadua gi togomaalia gi mee. Haga huudonu ina di ala e hana iei mee!” ^b
4 Di gahu o maa ne hai gi nia ngaahulu ‘camel’, dono tuu gili kau, ana meegai la nia manu-‘locust’ mo nia mee maangala lodo henua. ^c 5 Digau Jerusalem, digau mai nia madagoaa e logo i Judea, mo nia guongo ala i di gili di monowai Jordan ne lloomoi gi baahi o mee. 6 Digaula ga haagi nadau huaidu, gei mee ga babdais digaula i lodo di monowai Jordan. 7 Di madagoaa John ne gidee ia nia Pharisee mono Sadduccee dogologo ne lloomoi bolo e babdais, gei mee ga helekai gi digaula, “Goodou e hai be nia gihaa. Ma koai ne hagi adu bolo goodou e mee di tanga gi daha mo di hagaduadua a God dela ga dau mai? ^d 8 Goodou haga kila aga ina godou hangaahai gi modongoohia bolo goodou gu huli gi daha mo godou ihala. 9 Hudee hagamaanadu, bolo goodou e mee hua di tanga gi daha mo di hagaduadua a God, i goodou e helekai bolo goodou nia dama ni Abraham. Au e hagi adu gi goodou bolo God le e mee hua di huli nia hadu aanei gi hai nia dama ni Abraham! ^e 10 Talai la gu togomaalia i tono nia laagau. Malaa, nia laagau ala hagalee hua humalia, le e hele gi daha, e kili gi lodo di ahi. ^f 11 Au e babdais goodou gi nia wai, e haga modongoohia bolo goodou gu huli godou lodo, gei tangada dela e hanimoi i ogu muli, go mee dela e babdais goodou gi di Hagataalunga Dabu, mo di ahi. Mee koia e aamua i di au, gei au e dee tau loo bolo e bili gi nia suudi o maa. 12 Dana daawolo hili mee gu i dono lima, e hili ana palaawaa-‘wheat’, ga hagabudu mai nia lii ala e hai nia palaawaa gi lodo dana hale benebene mee, gei nia geinga le e dudu i lodo di ahi dee ngudu.”

Di babdais o Jesus

(Mark 1.9-11; Luke 3.21,22)

13 I di madagoaa deelaa, gei Jesus ne hanimoi i Galilee gi Jordan, belee babdais go John. 14 Gei John belee hai a Jesus gi huli ana maanadu, ga helekai gi mee, “Ma ko au dela belee babdais kooe, gei goe e hanimoi bolo au gi babdais ina goe!” 15 Jesus ga helekai, “Heia hua gi hai beelaa dolomeenei, idimaa, deenei di hai ga mee gidaua di haga gila aga di manawa o God.” Gei John gu baba ginai. 16 Jesus ne lawa i dono babdais, geia ga manawa aga gi daha mo nia wai, di langi gu mahuge, gei Jesus ga gidee ia di Hagataalunga o God e haneia be di mwuroi ga doo ia gi hongo o mee. 17 Gei di lee ga helekai mai i di langi, “Deenei dagu Dama dela e aloho gei e tene ginai au.” ^g